Sunday 8 March 2009

لا تنسوا ولا تهملوا صيام الأيام البيض لهذا الشهر

الصيام من أفضل الأعمال التي تتقرب بها إلى الله تعالى

وقد حثنا النبي صلى الله عليه وسلم على صيام الأيام البيض من كل شهر



والأيام البيض لهذا الشهر هي أيام
الثلاثاء - الأربعاء - الخميس
13 - 14 - 15
من ربيع أول
الموافق
10 - 11 - 12
مارس
وصلى الله على نبينا محمد وعلى آله وصحبه أجمعين
لا تنسوني من صالح دعائكم
-----
Posted by at

18 comments:

  1. احساس طفلة محبة للرومانسية بس واقعية8 March 2009 at 22:31

    جزيت خيرا يا مصرية على التذكرة
    ربنا يباركلك

    تقبلى مرورى

    ReplyDelete
  2. ELMASRYA - MOSLEMA LELLAH8 March 2009 at 23:29

    أهلا حبيبتي

    أنا فرحانه قوي انك هتصومي معايا

    وياريت تحطي ورقة في المسجد تعرفي الناس وتاخدي ثواب وانا كمان آخده معاكي

    لو مسجد توسكوبا قريب من البيت عندك ماتكسليش أرجوكي

    خالص مودتي

    ReplyDelete
  3. إيمان9 March 2009 at 15:28

    جزاك الله خيرا
    وجعله فى ميزان حسناتك
    تقبلى مودتى وحبى

    ReplyDelete
  4. ELMASRYA - MOSLEMA LELLAH9 March 2009 at 16:02

    وبارك الله فيكي يا إيمان

    لا حرمني الله من مرورك الجميل

    أحبك في الله

    ReplyDelete
  5. Anonymous10 March 2009 at 09:12

    ماما دايما بتذكرني بمواعيد الصيام وبنصوم سوا

    جزاكِ الله كل خير

    عالتذكرة الحسنة

    تقبلي مروري

    ReplyDelete
  6. ELMASRYA - MOSLEMA LELLAH10 March 2009 at 14:12

    ربنا يخلي ليكي ماما يا نواره

    ويتقبل عباداتكم ويجزيك بها خيرا

    خالص مودتي وتحياتي

    ReplyDelete
  7. Unknown11 March 2009 at 11:40

    السلام عليكم ورحمة الله وبركاتة
    جزاكى الله خيرا على التذكير
    ربنا يجازيكى بكل خير
    دمتِ بالف ود وخير

    ReplyDelete
  8. ELMASRYA - MOSLEMA LELLAH11 March 2009 at 12:54

    وعليكم السلام ورحمة الله وبركاته

    أهلا بأم سلمى

    يارب تكوني بخير انتي والقطة الصغنتوته بتاعتك

    ويارب تكوني صمتى وذكرتي اللي حواليكي بالصيام

    نورتيني وبارك الله فيكي على دعواتك الطيبة لي ولكي منها بالمثل

    ReplyDelete
  9. عاشقه الرومانسيه11 March 2009 at 15:03

    اولا باحيكى بتحيه الاسلام
    ثانيا باشكرك على كلامك الرائع على شخصيتى
    وفعلا انتى فتحتى عنيه على واقع انا لم المسه الا من كلامك
    انى واحده معقده
    وعندى مشاكل نفسيه
    ولازم اعرض نفسى على دكتور نفسى

    بس يعلم ربنا انك بكده ظلمتينى
    والظلم ظلمات يوم القيامه
    وبما انك بتمشى بقال الله وقال والرسول
    فاحب اقولك ان النصيحه على الملاء فضيحه
    كلامك الجميل ده كان ممكن تبعتيه لى على الميل
    وانتى عندك بدل الميل الواحد اتنين

    واسمحيلى نصيحه صغيره من واحده مجنونه
    بلاش تتسرعى فى الحكم على ناس ما تعرفيهمش وماعشرتيهمش كويس

    ReplyDelete
  10. ELMASRYA - MOSLEMA LELLAH11 March 2009 at 18:30

    بصي يا بنتي

    أنا قلتلك الكلام اللي غيري ممكن جدا مايقدرش يقوله

    وتوقعت انك تردي بالشكل ده وتفهمي غلط وده أكبر دليل على صحة كلامي

    انتي عندك مشكلة كبيرة ولو لم تواجهيها الخاسره الوحيده هي انتي

    راجعي موضوعك اللي كاتباه لصديقاتك على المدونة بتاعتك وشوفي الشعر اللي انتي كاتباه شكله ايه

    ده مش شعر بين بنت وبنت وماينفعش يتكتب أبدا وتقولي ده لصاحبتي وده لأختي لأن الكلام ده يابنتي بيتكتب من ولد لبنت او من بنت لولد

    ولعلمك ده مش رأيي الخاص أنا بس
    فيه ناس غيري ده رأيهم كمان ومقتنعين ان انتي لازم تلحقي نفسك قبل تفاقم المشكله اكتر

    انتي عندك حرمان عاطفي حاد وبتوجهيه بالتعلق بزميلاتك وبالبحث عن الاهتمام لدى الآخرين

    وللأسف علشان تثبتيه لنفسك وترتاحي كان ممكن تعرضي بنت زي كيارا لمشكله كبيره

    كان ممكن لا قدر الله يحصل حاجه لقلبها نتيجة خوفها عليكي

    كان ممكن لا قدر الله تموت من الخضه والحزن

    لكن انتي ولا على بالك انتي كل اللي اهتميتي بيه ان تثبتي حب الناس ليكي

    التصرف غير عقلاني بالمرة وغير طبيعي ويدل على تعب نفسي ومرض

    ولعلمك انا واحده من الناس مريضه وعامله عمليه في العمود الفقري كنت هنزل على ملا وشي ادور على المحل اللي بتشتغلي فيه واشوف جرالك ايه

    لو حصل كده كان هيبقى ايه منظرك وانا جايه مش قادره امشي اصلا وابني ساندني علشان نتطمن على جنابك
    قسما بالله لو كان حصل لاكنت ضارباكي قدام كل الناس لأن الناس مش لعبه وعلى مزاجك تحركيهم زي عرايس الماريونيت

    الناس ليها احترامها وتقديرها

    وحكاية ان انتي مجنونه دي كلمة خايبه جدا وفيها جهل شديد لان المرض النفسي مش معناه الجنون

    ونصيحه لوجه الله الحب اللي عماله تبعتريه على صاحباتك ده اعطي لأمك جزء منه لأن ربنا هيحاسبك عليها
    الحاجه الوحيده اللي انتي صح فيها ان كلامي كان هيكون أفضل لو ارسلته في ايميل لكن للأسف انزعاجي منك خلاني اكتبه في البلوج

    وكمان فيه حاجه يمكن عرضه على زميلاتك يخليهم يفكروا شويه ويساعدوكي

    وحاجه مهمه كمان المريض النفسي دايما مش بيعترف بمرضه وبيعتبر ان اللي حواليه ظلمه وأشرار وسفاحين

    الحقي نفسك يابنتي وانتي حره وافتكري دايما المثل اللي بيقول يابخت من بكاني ولا ضحكش الناس عليا

    وعلى فكره مش انتي اللي تحكمي على التقوى داخلي ومدى قربي من الله لسه بدري عليكي جدا علشان توصلي للمستوى ده من الحكمه والخبره

    أنا أصلا من الأشراف أحفاد رسول الله وصعب جدا انك توصلي للمستوى الخاص ليهم من التقوى والعباده

    مع السلامه

    ReplyDelete
  11. عاشقه وغلبانه11 March 2009 at 19:16

    جزاكي الله خير ياجميل
    وتقبل الله منا ومنكم صالح الاعمال

    ReplyDelete
  12. ELMASRYA - MOSLEMA LELLAH11 March 2009 at 19:23

    أهلا دكتورة توته

    حمد الله على السلامه يا حبيبتي

    ويارب تكوني صمتي

    هروح اشوف موضوعك الجديد حااااالا

    دمتي سالمة

    ReplyDelete
  13. بنت مصر12 March 2009 at 07:16

    بارك الله فيكي يا مصرية

    وجزاكي كل خير على التذكرة

    ReplyDelete
  14. Gannah12 March 2009 at 07:27

    السلام عليكم

    جزاك الله خيرا يا سيدتى
    قرأت تعليق عاشقة الرومانسية وردك عليها وانا لا اعرف الموضوع
    ولكن الواضح ان هناك فارقا فى العمر والخبرة أما التقوى فهى شىء لا يعلمه الا الله وهى لا تكون بالنسب
    وانما بالعمل
    فارق السن والخبرة كان يحتم عليكِ يا سيدتى الصبر عليها والنصيحة بالرفق ..وليس بالهجوم ..من الصعب تقبل النصيحة اذا كانت بهذه اللهجة الحادة..انا مقدرة رغبتك فى نصحها ولكن للنصح قواعد واعتقد انك لم تلتزمى بها
    انا مثلك اقول ما اراه حقا وارجو ان تتقبلى كلماتى بدون انفعال او غضب
    تحياتى

    ReplyDelete
  15. ELMASRYA - MOSLEMA LELLAH12 March 2009 at 11:58

    أهلا بحبيبتي بنت مصر

    يارب تكوني قمتي بصيام الأيام دي ولو لم يحالفك الحظ في هذا الشهر بإذن الله نصوم مع بعض الشهر القادم

    خالص مودتي وتحياتي

    ReplyDelete
  16. ELMASRYA - MOSLEMA LELLAH12 March 2009 at 12:13

    وعليكم السلام الأخت الفاضلة جنه

    سبقتيني بالزيارة كنت ناوية أجيلك لأني تعرفت على مدونتك عن طريق أمة الله موناليزا

    بالنسبة للموضوع الذي تحدثتي فيه طبعا اننتي أكيد لاحظتي إني عامله موديريشن على الردود

    ومن البداية لو كنت بغضب زلا أتحمل وجهة نظر الآخر ماكنتش عرضت رد الأخت صاحبة المشكلة

    انتي قلتي انك مش عارفه إيه الحكاية يبقى فعلا مش هيكون عندك تخيل ما يوجد بداخلي ودفعني للكلام معاها عبر المدونة وليس الإيميل

    النصيحة الهادئة كانت تصلح في حالتها لو لم يكن الموضوع كما حدث

    مانا قلتلك انتي ماعرفتيش حاجه ودي مشكلة لأنك علقتي على ردي بدون مايكون عندك خلفية وده خطأ طبعا لأنك كي تحكمي على موضوع يجب أن تكوني ملمة بكل جوانبه

    ردي على عاشقة الرومانسية رد طبيعي وفي مصلحتها وهي تستحقه لأن تصرفها كان تصرف غير مسئول وماينفعش نطبطب على حد في الوقت اللي يكون هو فاتح دماغنا بطوبة

    بالنسبة للتقوي التي بالعمل أكيد انا عارفه المعلومة دي وبما أنها بالعمل يبقى الحمد لله أنا من المتقيات لربهم وضيفي عليها النسب المشرف كمان

    فارق السن بيني وبينها والخبره كانوا يحتموا عليا توجيهها بالشكل ده لأن هي لا احترمت سن ولا احترمت خبره ولا احترمت حد

    اللي أحب أقوله يا أخت جنه ان دفاعك عنها أفضل انه يكون بتوجيهها بدل من توجيهي لأن أنا عديت مرحلة التوجيه والنصايح دي الحمد لله من زمان

    مشكلتنا في بلادنا العربية ان لما تحصل حاجه ندافع عن الشخص اللي يبدو أمامنا انه ضعيف ومهزوم من غير مانعرف هو أصلا عامل ايه ومش بنكلف انفسنا مشقة البحث عن الحقيقة

    وللأسف ده اللي انتي اتبعتيه في التعليق عندي يا أخت جنه

    هعيد واقول مره تانيه كلامي ليها كان لازم يكون بالطريقة دي ولا توجد طريقة اخرى ولكل انسان أسلوبه في إدارة الأزمات

    ثانيا الحمد لله من يتقي الله أكيد بيشعر بنفسه ولما جت الأخت دي بتحاول تنتقص من شأن عبادتي وتقوايا لله كان لازم أفكرها لأن من لا ينتسب للرسول عليه الصلاة والسلام يعمل مافي وسعه للاقتداء به فمابالك ممن هم من نسله

    يعني ردي مافيهوش أي تعالي أو عنجهية بل هو مجرد توضيح للامور وحفظ حقي في الرد على كلامها التهكمي الغير لائق

    دمتي سالمة أخت جنه

    ReplyDelete
  17. rovy12 March 2009 at 15:09

    السلام عليكم و رحمة الله و بركاته
    اختى الفاضله
    ارجو تقبل زيارتى و تعليقى ايضا .. اولا جزاكى الله خير على النصيحة اختى الكريمه فى البوست و اتمنى ان يتسع صدرك لما هو ات فى تعليقى
    الحقيقه انى تناقشت مع اختى جنه فى ردك على تعليق عاشقة الرومانسيه و قد احزننى تلك الطريقه فى النصح
    و انتى اعلم بقول الرحمن عز وجل ادعو الى سبيل ربك بالحكمة و الموعظة الحسنه و انا لا اريد ان اطيل عليكى لأنى اكيد لا اعلم الموضوع و لكنى كنت اتمنى ان يكون الحوار بينكم اهدأ من هذا ليأتى ثماره و ايضا حتى لا ينفر الشباب من العباده اذا قدمت لهم بصوره قاتمه ..
    اختى الكريمه سامحينا لتدخلنا و لكننا ما تعودنا ان نرى شىء يشعرنا بأسى الا و تدخلنا به و لقد تألمت لعاشقة الرومانسيه حتى وان اخطأت كما ذكرتى و تمنيت لو اوصلتى لها النصيحة بحب و اخوه و لو كان عتاب لشىء اغضبكى منها فأيضا كان من الممكن ان يكون بحب حتى تتقبله .. اتمنى ان تتقبلى تعليقى و ان لا يحزنك ان تكون اول زيارتنا لكى انا و جنه عتاب فهو عتاب اخوه متحابات فى الله و رسوله
    دمت سالمه
    تحياتى

    ReplyDelete
  18. ELMASRYA - MOSLEMA LELLAH12 March 2009 at 16:30

    وعليكم السلام ورحمة الله يا روفي

    أهلا بيكي ولو انك مش جايه تعلقي على موضوع مفيد كاتباه في المدونة

    ومش عارفه الحقيقة ايه الحكاية اصلا يعني

    عبادة ايه اللي بوجه ليها صاحبة المشكلة ؟

    طيب ماتعرفوا الموضوع الاول وبعدين تتناقشوا

    والأهم من ده كله أصلا ان المناقشه تكون لو فيه موضوع مطروح للنقاش وأنا لم أطرح هذا الموضوع

    مش فاهمه والله انتم بتتصرفوا كده ليه؟

    طالما لا تعرفوا اذن لا تحكموا بالإضافة لشيء مهم جدا اني لا أكتب عن سفه وغباء وجهل يعني أنا أعني كل ما أقوله ومقتنعه به تماما

    إذا البنت صعبانه عليكم قوي كده رروحوا عالجوها

    أنا بتكلم بمنتهى الجدية

    وياريت اذا هتشرفوني تاني بالزيارة يبقى للتحدث في موضوع هام يكون مطروحا للمناقشه وتابع للمدونة

    التحلي بخلق الاسلام عظيم جدا لكن مش معنى كده نتصرف بليونه تجاه الأخطاء التي لا ترضينا

    الاسلام قوة مش ضعف

    وفيه ناس ماينفعش معاهم الطبطبه

    صاحبتك اللي بتداقعي عنها عرضت بنت لتعب نفسي حاد ونكدت عليها حياتها ولم تراعي الله فيها وكان ممكن ان البنت تصاب بأزمه قلبية أو تموت من الخضه والانفعال

    أنا لا أعرف البنت المسكينة الأخرى لكن اعتبرتها زي بنتي وانفعلت من أجلها

    وأقسم بالله وأكررها لو كانت بنتي فعلا أنا كان هيبقى ليا تصرف تاني خالص

    الاسلام مش معناه الناس تقرف بعض وتخنق بعض وتستهبل في التصرفات واحنا نقول حرام غلابه مساكين مش فاهمين
    فيه حاجات لازم رد الفعل ليها يكون حازم جدا

    بدل من حزنكم الشديد لواحده اتصرفت غلط روحوا عالجوها واصلحوها طالما انكم على القدر ده من الطيبه وقوة التحمل حتى في أصعب الظروف

    كل انسان تختلف ردة فعله تجاه المواقف المختلفه

    وأنا مقتنعه تماما بما فعلته ولو تكرر الموقف مره أخرى سيكون رد فعلي بنفس الشكل ويمكن أكثر شده كمان
    ياريت نبطل الليونة في التعامل مع الأخطاء علشان حالنا يتصلح بقى

    المواجهة أقصر الطرق لحل المشاكل

    شرفتيني يا روفي وأحترم احساسك الطيب لكن لكل مقام مقال

    دمتي سالمة

    ReplyDelete

Subscribe to: Post Comments (Atom)